روسیه: امریکا د غلتو سیاستونو پر بنسټ د افغانستان پانګه کنګل کړې ده

په ملګرو ملتونو کې د روسیې ځانګړي استازي واسیلي نبنزیا یو ځل بیا په افغانستان کې د امریکا پر سیاسیتونو نیوکه کړې او دغه سیاستونه یې ناکام بللي دي.

د جمهور خبري آژانس د خبر له مخې دغه روسیې دیپلومات ټینګار کړی، چې په افغانستان کې د امریکا سیاسي او بشردوستانه سیاسیتونو ماته خوړلې او ناکام دي.

نوموړي د اتریش پلازمینه وین کې د یوې ناستې پر مهال ویلي، چې امریکا د خپلو غلتو سیاسیتونو پر اساس د افغانستان پانګه کنګل کړې ده.

د روسیې استازی دا څرګندونې پر داسې مهال کوي، چې واک ته د طالبانو له رسېدو سره سم امریکا د افغانستان څه باندې ۹ میلیارد ډالره پانګه کنګل کړه.

که څه هم طالبانو او ځینې نورو هېوادونو په وار وار له امریکا غوښتي، چې د افغانستان پانګه خوشې کړي، خو امریکا وایي، تر چې طالبانو ټول شموله حکومت نه وي جوړ کړی، ښځو ته یې د تعلیم اجازه او بشري حقونه نه وي خوندي کړي او له امریکا سره یې کړې ژمنې نه وي عملي کړې، پانګه به خوشې نه کړي.

جمهورخبري آژانس:کابل