بایډن د سرتېرو په ایستلو ستره تېروتنه وکړه، د امریکا سیاست یې زیانمن کړ

مخکښ امریکايي سناتور لیندسي ګراهام یو ځل بیا د امریکا پر ولسمشر جوبایډن توندې نیوکې کړې وايي، بایډن له افغانستان د سرتېرو په ایستلو سره ستره او تاریخي تېروتنه وکړه.

د جمهور خبري آژانس د خبر له مخې دغه امریکايي سناتور په یوه مرکه کې ویل، چې بایډن تل د امریکا بهرنۍ سیاست زیانمن کړی دی.

نوموړي ټینګار کړی، چې له افغانستان د امریکایي ځواکونو بې وخته وتل ستره تېروتنه وه او په دغه هېواد کې د امریکا متحدینو ته شا اړول دغه هېواد په نړیواله کچه بې باوره کړی دی.

امریکايي سناتور ګراهام زیاتوي، د دې وخت دی چې د بایډن او د هغه د ناسمو سیاستونو پر وړاندې امریکایي وګړي اقدام وکړي.

دغه امریکايي سناتور وايي، بایډن د افغانستان په مسئله کې سرتمبګي کوله او د امریکایي جنرالانو خبرداریو او اټکلونو ته یې ارزښت نه ورکاوه، نو له همدې امله په افغانستان کې د هر پېښېدونکي وضعیت مسوولیت پر بایډن دی.

د یادونې ده، چې تر دې وړاندې د امریکا مخکني ولسمشر ډونالډ ټرمپ او د هغه د بهرنیو چارو وزیر مایک پمپیو هم پر بایډن نیوکې کړې او ویلي یې و، چې هغه په نړۍ کې د امریکا حیثیت له صفر سره ضرب کړ او اوس له امریکا نه څوک وېره لري او نه هم باور.

جمهورخبري آژانس:کابل