سیمه ییزه امنیتي سرچینې وايي، د هلمند د سنګین ولسوالۍ امنیه قوماندان له خپلو ۱۰ ساتونکو سره یو ځای په یوه وسله وال برید کې وژل شوی دی.
د جمهور آژانس د خبر له مخې سرچینې زیاتوي، چې دغه پېښه تېره شپه (د وري ۶ مه) د نهرسراج ولسوالۍ د شونډک مانده په سیمه کې رامنځ ته شوې ده.
د هلمند امنیه قوماندان مل پاسوال ولي جان سرحدي د دې پخلی کوي، چې د سنګین ولسوالۍ پر امنیه قوماندان عبدالمحمد سروري د نهرسراج ولسوالۍ په شوندک مانده سیمه کې برید شوی، خو په اړه یې نور جزیات نه دي ورکړي.
خو د هلمند یوې لوړ پوړې امنیتي سرچینې ویلي، چې د سنګین امنیه قوماندان عبدالمحمد سروري له خپلو اتو ساتونکو سره یو ځای د وسله والو طالبانو په ډلیز برید کې وژل شوی دی.
د سرچینې په وینا امنیه قوماندان په دغه سیمه کې د پولیسو په یوه قرارګاه کې و، چې د طالبانو له خوا ډلیز برید پرې شوی دی.
په ورته وخت یوې بلې سرچینې ویلي، چې امنیه قوماندان له خپلو ۹ ساتونکو سره په نفوذي برید کې وژل شوی، چې په اړه یې پلټنې روانې دي.
طالبانو تر اوسه په دې اړه څه نه دي ویلي.
جمهورخبري آژانس:هلمند
