قرارداد واردات برق از تاجیکستان تمدید شد

شرکت برق افغانستان تحت مدیریت طالبان می‌گوید که قرارداد واردات برق از تاجیکستان برای سال 2024 را تمدید کرده‌است.

این شرکت امروز چهارشنبه 6 جدی، گفته که قرارداد تمدید برق تاجیکستان، در دیدار محمدحنیف حمزه رییس اجرایی شرکت برشنا با محمدعمر آسوزاده، رییس شرکت برق تاجیکستان در ترکیه امضا شده‌است.

بر بنیاد اعلامیه، دوطرف در مورد انتقال لین 5oo کیلوولت برق از تاجیکستان به افغانستان نیز گفتگو کرده‌اند.

اعلامیه افزوده که طرف تاجیکستان در مورد انتقال این لین برق هم، تمایل نشان داده‌است.

همچنین در اعلامیه آمده که رییس طالبان در شرکت برشنا از تاجیکستان خواسته است تا در راه‌اندازی مجدد، هماهنگی و تطبیق پروژه‌ی کاسا یک‌ هزار، با افغانستان همکاری کند.

بر اساس این پروژه، قرار است برق قرقیزستان و تاجیکستان از طریق خطوط انتقال انرژی با طول 1250 کیلومتر به افغانستان و پاکستان انتقال یابد.

خبرگزاری جمهور