هلمند کې د هاموې ټانکونو په وسیله ډلیز ځانمرګي بریدونه شوی

سیمه ییز چارواکي وايي، وسله والو طالبانو په هلمند ولایت کې د هاموي ټانکونو څخه په ګټې اخیستنې سره ځانمرګی برید کړی، چې له امله یې پنځه افغان سرتېري ټپیان شوي دي.
د جمهور آژانس د خبر له مخې چارواکي زیاتوي، چې دغه پېښه نن سهار د هلمند ولایت د ګرشک ولسوالۍ د ده آدم خان او پاشک سمو ته څېرمه رامنځ ته شوې ده.
د هلمند ولایت له مطبوعاتي دفتره خپره شوې خبرپاڼه وايي، وسله والو مخالفينو د ده آدم خان او اوپاشک سيمو امنيتي کمربندونو ته څېرمه په انفجاري توکو بار دوه هاموې ټانګونو ته چاودنې ورکړې ده.
سرچینه زیاتوي، چې په دغه چاودنو کې دوه د ملي اردو او درې ملي پولیس سرتېري سطحي ژوبل شوي او درېیم موټر بم د پولیسو تر پېژندلو وروسته هدف ګرځول شوی او له منځه وړل شوی دی.
په خبرپاڼه کې ویل شوي، اوس مهال د ګرشک ولسوالۍ ده آدم خان، پارچاو او اوپاشک سيمو کې امنيتي او دفاعي ځواکونه د مخالفينو سره په نښته بوخت دي، چې د هوايي ځواکونو له لوري يې بشپړ ملاتړ کېږي.
د چارواکو په خبره په سيمو کې وضعيت د ځمکنيو او هوايي ځواکونو تر بشپړ کنټرول لاندې دی، چې د مخالفينو د ځپلو او له سيمو د پر شا کېدو تر وخت پورې به پرې بريدونه دوام ولري.
خو ځینو امنیتي سرچینو رسنیو ته ویلي، چې په دغه برید کې ۸ سرتېري وژل شوي او ۸ نور ټپیان شوي دي.
خو وسله والو طالبانو تر اوسه په دې اړه څه نه دي ویلي.
جمهورآژانس:هلمند