طالبان باید ځان ته داسې مشر وټاکي چې ټولو ډلو ته یې د منلو وړ وي

په افغانستان کې د ناټو د غوڅ ماموریت مشر جنرال جان کمپل وايي، د طالبانو په ډوه ډلو وېشلو سره د سولې خبرې ستونزمنې شوې او طالبان باید هڅه وکړي، باید هڅه وکړي چې ځان ته داسې مشر وټاکي چې ټولو ډلو ته یې د منلو وړ وي.
د جمهور آژآنس د خبر له مخې کمپبل چې تېره ورځ په کابل کې خبریالانو ته خبرې کولې وویل، چې د طالبانو مشر ملا اخترمحمد منصور ټولو طالبانو ته د منلو وړ نه دی.
نوموړي زیاته کړه، په داسې حال کې چې طالبان په دوه ډلو وېشل شوي په اوسنیو شرایطو کې دغه کار د سولې خبرو ته د طالبانو چمتو کول ستونزمن کار دی او په دې برخه کې د یو شمېر هېوادونو ګډې همکارۍ ته اړتیا ده.
هغه په خپلو خبرو کې وویل«طالبان باید خپلې رهبرۍ ته داسې کسان راولي چې د دوی ښه استازیتوب وکړي، دا به ډېر وخت ونیسي چې طالبان د سولې میز ته کېنول شي، خو افغانستان، پاکستان، چین، امریکا او یو شمېر نور هېوادونه باید طالبان وهڅوي چې د سولې خبرو ته حاضر شي، خو که چېرې طالبان سره جلا وي دا کار به ستونزمن وي.»
ده په ورته وخت کې دا هم وویل، چې طالبان باید نور د خلکو او امنیتي ځواکونو له وژلو لاس واخلي او سیاسي حل ته غاړه کېږدي.
نوموړي وویل«طالبانو ډېر نړیوال ځواکونه هم وژلي خو اوس یې جګړه له افغان ځواکونو سره ده او موږ هم په دې برخه کې د افغان ځواکونو ملاتړ کوو، موږ د افغان ځواکونو تجهیز او د هوايي ځواکونو سمبالښت ته ژمن یو.»
هغه زیاته کړه، چې راتلونکې میلادي میاشت به افغان ځواکونو ته یوه بم غورځونکې الوتکه ورکړي او په راتلونکو دریو کلونو کې به د افغان هوایي ځواکونو اړتیاوې پوره کړي.
کمپبل و ویل دا ښه کار دی چې افغانستان له چین، هند او روسیې څخه مرسته غواړي، خو نوموړي د روسیې په مرستو محتاطانه غبرګون وښود او ویې ویل په سوریه کې باید د روسیې اعمالو ته وکتل شي.
جمهور آژانس:کابل