د افغانستان د تېر حکومت د ملي امنیت رئیس رحمت الله نبیل د ښځو او بشري حقونو لپاره د امریکا ځانګړې استازې رینا امیري په بې کفایتۍ تورنه کړې ده.
ښاغلي نبیل د دوحې په درېیمه غونډه کې د افغان ښځینه استازو نه ګډون ته په اشارې سره په خپله ایکس پاڼه کې لیکلي چې دې مسلې د مېرمن امیري "بشپړ بې کفایتي" خلکو ته په ډاګه کړه.
هغه زیاته کړه، "د افغانستان د مدني ټولنې ډلې باید له هغې [رینا امیري] څخه وغواړي چې یا دې دې مسلې [د دوحې په غونډه کې د ښځو حضور] ته غاړه کیږدي او یا دې استعفا ورکړي."
نبیل د دوحې په غونډه کې د ښځو د نه ګډون په اړه د امریکا چوپتیا د اندېښنې وړ وبلله.
د يادونې وړ ده، چې د دوحې غونډه به څو ورځې وروسته د ملګرو ملتونو په کوربه توب د يادو هېوادونو د ځانګړيو استازيو او د طالبانو د استازو په ګډون جوړه شي.
ویل شوي چې د دوحې له غونډې مخکې او وروسته پلان لري چې له ښځینه فعالانو او د افغانستان د مدني ټولنې له ډلو سره سلا مشورې وکړي، خو دوی به په هغو غونډو کې ګډون ونه کړي چې طالب چارواکي پکې حضور ولري.
جمهورخبري آژانس
