په کابل کې عامه سرچینې وايي چې یوه طالب جنګیالي د غلا په نیت یو ټکسي چلوونکی په ډزو وواژه.
د سرچينې د معلوماتو له مخې، د جوزا په ٢٥مه شپه د نوراغا په نوم يوه طالب جنګيالي د کابل په پل چرخي سيمه کې د "شمس" په نوم يو ټکسي چلوونکى د سر په ګوليو وواژه.
سرچينې زياته کړې چې دغه طالب جنګيالي له ټکسي چلوونکي څخه وغوښتل چې د کابل بادام باغ ته يې بوځي. خو په لاره کې هغه په مغزو کې په مرمۍ ولګېد او له موټر څخه بهر وغورځول شو.
ويل کيږي چې دغه طالب جنګيالي ددغې ډلې د نورو جنګياليو له خوا د ټکسي چلوونکي له وژلو وروسته نيول شوى او په خپل جرم يې اعتراف کړى دى.
دا په داسې حال کې ده چې ویل کېږي په تېرو درېیو کلونو کې؛ په کابل او ولایتونو کې ډېرې وسله والې غلاوې او تښتونې؛ د طالب جنګیالیو لخوا او یا هم په همکارۍ ترسره کیږي.
جمهورخبري آژانس
