په غور ولایت کې عامه سرچینې وايي، چې د دغه ولایت په الله یار ولسوالۍ کې یوه مېرمن او لور یې وژلي دي.

د سرچينې د معلوماتو له مخې، د يادو دوو کسانو مړي د غبرګولي په ١٩مه، د ځايي اوسېدونکو له خوا د الله يار ولسوالۍ د "اګرم" له کلي څخه موندل شوي دي.

دغه ښځه او د هغې اوه کلنه لور کابو دوه میاشتې وړاندې د شپې له خوا په همدې کلي کې له خپل کور څخه ورک شول.

ويل شوي دي چې تښتوونکو؛ لومړی یې دا دوه کسان ووژل او بیا یې ښخ کړل.

د دې پېښې انګېزه او عاملین لا هم نه دي معلوم.

جمهورخبري آژانس