د طالبانو سیاسي مرستیال مولوي عبدالکبیر وايي، د نوي نسل د فکري اصلاح لپاره باید د دیني او ملي ارزښتونو په رڼا کې کتابونه، مقالې، خپرونې او اصلاحي ویډیوګانې په ټولنیزو شبکو کې خپرې شي. 

طالبانو په یوه خبرپاڼه کې ویل شوي، چې مولوي عبدالکبیر دغه خبرې د پلچرخي په زندان کې د کتابونو د اونۍ د نندارتون پر مهال وکړې.

مولوي کبیر ویلي، زندانونه او توقيف ځايونه بايد د شکنجې او وهلو مرکزونه نه، بلکې د اصلاح او پوهې مرکزونه وي او هر بندي چې له بنده خوشې کېږي، بايد د ټولنې د اصلاح او هوساينې لپاره کار وکړي.

د طالبانو  سیاسي مرستیال ټینګار کړی چې د فکري سمون په خاطر باید په ټولنیزو شبکو کې کتابونه، مقالې، اصلاحي پروګرامونه او ویډیوګانې د دیني او ملي ارزښتونو په رڼا کې نوي نسل ته وړاندې شي، څو د دوی په وینا د دینې او دسیسو ښکار نه شي. د بهرنیانو د افکارو او تبلیغاتو تر اغیز لاندې.

جمهورخبري آژانس