د ازبکستان ولسمشر شوکت میرضیایف وايي، افغانستان د سیمې په ثبات کې حیاتي رول لري او نه باید دغه هېواد هیر کړای شي.
 
ښاغلي میرضیایف تېره ورځ د لیندۍ ۴ مه د سپیکا غونډه کې ویلي، افغانستان د مرکزي آسیا د نه بېلېدونکې برخې په توګه د سیمې په ثبات کې حیاتي رول لري.
 
ده زیاته کړې«موږ نه شو کولی افغانستان په اوسنیو ستونزو کې ګير پرېږدو او په نړیوالو خبرو اترو کې د طالبانو له ګډون پرته نه شو کولی یوې مثبتې پایلې ته ورسېږو.»
 
نوموړي د ملګرو ملتونو د اقتصادي کمېسیون څخه غوښتي، چې د افغانستان سره د اقتصاد په برخه کې همکاري وکړي.
 
د یادونې وړ ده، چې د مرکزي آسیا هېوادونو لپاره د ملګرو ملتونو ځانګړې اقتصادي ناسته یا «سپیکا» باکو کې د افغانستان د استازي له ګډون پرته تر سره شوه.
 
جمهورخبري آژانس