ځانمرګي بریدونه حرام دي، مخالفین د عامو افغان پر ضد جګړه کوي

د افغانستان د علماوو شورا یو ځل بیا ځانمرګي بریدونه حرام وبلل او وايي، د افغانستان اوسنۍ جګړه د پردیو د ګټو له پاره ده او وسله وال مخالفینو د عامو افغانانو پر ضد جګړه روانه کړې.

د جمهور خبري آژانس د خبر له مخې د افغانستان علماوو شورا نن سه شنبې د سلواغې ۱۰ مه کابل کې د یوې ناستې پر مهال وروستي خونړي بریدونه په کلکو ټکو وغندل او دا بریدونه یې په اسلام کې حرام او ناراو و وبلل.

د علماوو شورا رییس مولوي قیام الدین کشاف په غونډه کې د علماو شورا هغه پرېکړه لیک چې په کې ځانمرګي بریدونه حرام بلل شوي ولوسته او ویې ویل، چې وروستي بریدونه له ټولو اسلامي او انساني اصولو خلاف کار و.

نوموړي وویل هغه بریدونه چې عام خلک په کې وژل کېږي په اسلام کې هېڅ ډول ځای او توجیه نه لري او پر وسله والو مخالفینو یې غږ وکړ، چې د خپلو بریدونو له پاره دې په اسلام کې توجیهات نه لټو.

د علماوو شورا په دې پرېکړه لیک کې پر وسله والو مخالفینو غږ شوی، چې هېچا ته د خونړیو بریدونو او وحشیانه جګړې د تر سره کولو اجازه نه ده ورکړې او دوی دې هم دغه ډول بریدونو ته توجیهات نه لټوي.

په ناسته کې د افغانستان وتلي دیني عالم او د یادې شورا غړي مولوي عبدالسلام عابد د دغه پوښتنې په ځواب کې چې ایا د طالبانو او داعش جګړه روا ده که نه وویل«هغه جګړه او بریدونه چې بې ګناه خلک په کې وژل کېږي، اسلام څه ان چې عقل یې هم نه مني او دغه جګړه نه یوازې ناروا بلکې یو وحشت دی.»

دغه را یو بل تن دیني عالم مولوي ریحان هم و ویل، چې په افغانستان کې اوسنۍ جګړه یوه تپل شوې جګړه ده، چې بهرنۍ استخباراتي کړۍ په کې لاس لري او په کې ترسره کېدونکي اعمال له وحشت پرته بل څه نه دي.

مولوي ریحان پر ټولو علماوو، سیاسیون، رسنیو او ولس غږ وکړ، چې د دښمن د هڅو د شنډولو او ماتې له پاره سره یو لاس شي او افغانستان له روانې بدبختي وژغوري.

دغه راز په دې غونډه کې د پاکستان د علماوو پر وروستۍ فتوا هم نیوکه وشوه او هغه یې اسلامي فتوا نه بلکې یوه ابلاغیه وبلله.

دیني علماوو ځکه د پاکستاني علماوو وروستۍ فتوا چې په پاکستان کې یې ځانمرګي بریدونه حرام بللې ځکه نیګړې وبلله، چې په وینا یې قراني نصوص د ټول امت مسله له پاره دي نه یوازې د یوې سیمې د خلکو له پاره.

همدارنګه په غونډه کې د پاکستان د علماو د مشر مولانا طاهر اشرفي پر وروستیو څرګندونو هم نیوکه وشوه، خو د علماوو شورا ویاند مولوي محمد قاسم حلیمي وویل، د طاهر اشرفي پر څرګندونو ځکه نظر نه ورکوي، چې په وینا یې هغه معذور، شرابي دی.

په ناسته کې د علماوو شورا د امریکا د ولسمشر ډونالډ ټرامپ پر وروستیو څرګندونو چې ویلي یې دي، نور له طالبانو سره خبرې نه کوي په اړه و ویل، چې دا د هغه خپل نظر دی.

علماوو و ویل، چې د اسلام دین همېشه د سولې پلوي او سوله غواړي او افغان حکومت او افغان ولس هم له وسله والو مخالفینو له کوم مخکني قید شرط پرته سوله غواړي.

د یادې ناستې برخوال او د سولې عالي شورا او د علماو شورا غړي مولوي عطاالله لودین په دې اړه و ویل، د طالبانو وروستیو بریدونو وښوده، چې دوی د افغان حکومت او ولس سره د سولې خبرې نه کوي، بلکې غواړي، چې له امریکا سره دغه خبرې وکړي، چې په وینا یې د امریکا ولسمشر هم طالبانو ته خپل ځواب ورکړ او ورته ویې ویل، چې نور له طالبانو سره خبرې نه کوي.

جمهورخبري آژانس:کابل