د روغتیا نړۍوال سازمان په خپل تازه راپور کې په افغانستان او پاکستان  کې د پولیو یا ګوزڼ ناروغۍ د جرړو پر اېستلو ټینګار کړی او ویلي یې دي چې تېر میلادي کال په دغو دواړو هېوادونو کې څه باندې۱۰۰ مثبتې پېښې ثبت شوې دي.

د جمهور آژانس د خبر له مخې د دغه راپور په بله برخه کې دغه سازمان له غړو هېوادونو، مرستندویو بنسټونو او نړۍوالې ټولنې غوښتي چې له افغانستان او پاکستان سره خپل ملاتړ ته دوام ورکړي.

 د روغتیا د نړۍوال سازمان د راپور یوه برخه داسې ده:  سره له دې چې د پام وړ پرمختګ شوی، تېر کال په افغانستان او پاکستان کې له ۱۰۰ ډیر ماشومان د پولیو ویروس له امله فلج شوي دي. فرعي کمیټې په افغانستان او پاکستان کې د پولیو ویروس د لیږد د درېدو په تړاو یوه اعلامیه هم خپره کړه، چې له غړو هیوادونو، بسپنه ورکوونکو او نړیوالې ټولنې یې وغوښتل چې خپل ملاتړ ته دوام ورکړي ځکه چې وروستيو دووو سیمه ییزو هیوادونه د ویروس د لیږد د پای ته رسولو لپاره خپلې هڅې دوه برابره کړې دي.»

دا په داسې حال کې ده، چې د هېواد د روغتیا وزارت تېر زېږیز کال د پولیو مثبتې پېښې رد کړې وې او د پولیو د واکسیناسیون په وروستي کمپاین کې یې په ټول هېواد کې له پنځو کلونو کم عمره څه باندې ۱۱میلیونه ماشومان واکسین کړل.

جمهورخبري آژآنس