له پاکستان څخه د افغان کډوالو ایستل یوه انساني تراژیدي ده

د "بې ځایه شویو کسانو نړیوال" په نوم د کډوالو د ملاتړ یوې ادارې ویلي چې د پاکستان حکومت لخوا د افغان کډوالو ایستل یوازې یوه سیاسي یا امنیتي مسله نه ده، بلکې یوه انساني تراژیدي ده.

د جمهور اژانس د راپور له مخې، دې نړیوال سازمان نن، یکشنبه (د وري ۳۱مه) په یوه بیان کې وویل چې د پاکستان له خوا د افغان کډوالو ایستل یوازې یوه سیاسي یا امنیتي مسله نه ده، بلکې یوه انساني تراژیدي ده.

په بیان کې زیاته شوې ده چې د افغان کډوالو څو نسلونه په پاکستان کې لوی شوي دي او د دوی ناڅاپي اخراج د ادغام، ګډو ټولنو جوړولو او همکارۍ لپاره د لسیزو هڅې تر پوښتنې لاندې راولي.

د سازمان چارواکو وویل چې داسې راتلونکې باید وي چې افغانستان او پاکستان پکې د ګاونډیتوب سوله ایزې اړیکې ولري، او دا راتلونکې باید د انسانیت لپاره د متقابل درناوي سره پیل شي.

دې سازمان ټینګار کړی چې مهاجرینو ته باید اجازه ورکړل شي چې له خپلو شتمنیو سره له هیواده ووځي.

جمهورخبري آژانس