د طالبانو د صنعت او سوداګري وزارت وايي، چې تېر کال د څه باندې ۱۵ میلیونه ډالرو په ارزښت له ۳۹۰۰ ټنه ډېرې غالۍ بېلابېلو هېوادونو ته صادرې شوې دي.

د جمهور آژانس د خبر له مخې غالۍ اوبدونکو او صادروونکو ټولنې د معلوماتو له مخې، اوس هم د هېواد په یو شمېر ولایتونو کې غالۍ په دودیز ډول اوبدل کېږي.

د غالیو د تولید ظرفیت د کچې په لوړېدو سره یې اوبدونکي په هېواد کې د ننه او بهر د پېرېدونکو له غوښتنې سره سمې په بېلابېلو رنګونو او ډیزاینونو غالۍ جوړوي.

د غالیو د تولیدوونکو او صادروونکو ټولنې مسوولین وايي، که څه هم چې د غالیو ۵۰ سلنه خام مواد له ګاونډیو هېوادونو واردېږي، خو سرپرست حکومت د ګمرکي تعرفو په معافیت سره په دې برخه کې د ملي او نړۍوالو غالیو د نندارتونونو په جوړولو کې ډېرې اسانتیاوې را منځته کړې دي.

جمهورخبري آژانس