م.م کارپوهان: پاکستان دې د افغانان کډوالو د جبري ستنولو لړۍ ودروي

د ملګرو ملتونو کارپوهانو له پاکستانه وغوښتل، چې د اسلام‌اباد، راولپنډۍ او له نورو ښارونو څخه د افغانانو د اېستلو او افغانستان ته یې د جبري ستنولو لړۍ ودروي.

د جمهور خبري آژانس د خبر له مخې د ملګرو ملتونو کارپوهانو د جمعې په ورځ د پاکستان پر حکومت غږ کړی چې د یوه ګاونډي هېواد په توګه خپل مهم رول ادا کړي. د کارپوهانو په خبره په پاکستان کې میلیونونه افغانان د خپل اصلي خوندیتوب اندیښنو په پام کې نیولو پرته افغانستان ته د بیرته ستنیدو له ګواښ سره مخ دي.

دوی وایي په دغه ګواښ کې د جنسیت پر بنسټ تاوتریخوالی، د ښځو او نجونو د حقونو سیستماتیک تخریب، د بشري حقونو د نړۍوال قانون او د کډوالو د قانون څخه سرغړونه او د (یو این ایچ سي ار) سره د بېرته ستنولو مشورې نه کول شامل دي.

جمهورخبري آژانس