طالبانو له ګاونډیو هېوادونو څخه د افغان کډوالو د ایستلو د بندولو غوښتنه وکړه

د طالبانو ډلې اعلان کړی چې د کډوالو ستونزو ته د رسیدګۍ عالي کمیسیون له ګاونډیو هېوادونو څخه د افغان کډوالو د ایستلو د درولو غوښتنه کړې ده.

د جمهور اژانس د راپور له مخې، د طالبانو ډلې نن دوشنبه (د کب ۲۷مه) اعلان وکړ چې د کډوالو د ستونزو د حل لپاره یو عالي کمیسیون د دې ډلې د اداري مرستیال مولوي عبدالسلام حنفي په مشرۍ جوړ شوی دی.

طالبانو ویلي چې له ګاونډیو هېوادونو څخه غوښتل شوي چې د افغان کډوالو د سمدستي او جبري اخراج څخه ډډه وکړي، کډوالو ته ورکړل شوي خدمات په سمه توګه بشپړ کړي او د ګډ میکانیزم پر بنسټ د دواړو هېوادونو سره په همغږۍ کې افغان کډوال هیواد ته انتقال کړي.

د طالبانو ډلې د اسلامي همکاریو سازمان، ملګرو ملتونو، اروپايي ټولنې او نورو نړیوالو بنسټونو او سازمانونو څخه غوښتي چې د افغان کډوالو ستونزو ته ځانګړې پاملرنه وکړي، ترڅو ډاډ ترلاسه شي چې د افغان کډوالو حقونه تر پښو لاندې نه شي او د ګاونډیو هیوادونو د چارواکو د چټکو او غیر عادلانه پریکړو له امله دوی ظلم ونه شي.

طالبانو ویلي چې نړیوال بنسټونه باید د کوربه هیوادونو سره د یوې روغې لیږد پروسې په اړه کار وکړي ترڅو د کډوالو بیرته ستنیدل د یو ځانګړي میکانیزم پر بنسټ ترسره شي.

جمهورخبري آژانس