نړۍوال بانک: افغانستان کې نږدې ۳ میلیونه کسان له قحطۍ سره مخ دي

نړیوال بانک یو ځل بیا ویلي چې، افغانستان د خوړو د امنیت له شدید بحران سره مخ دی.

بې وزلي او بې روزګاري په افغانستان کې د خوړو د نا امنۍ یو له اصلي لاملونو ګڼل کیږي چې د اقتصادي ستونزو، اقلیمي بدلونونو او څو کلنو جګړو له امله رامنځته شوی دی.

نړۍوال بانک هم په افغانستان کې د خوړو د خوندیتوب د خرابېدو په تړاو اندېښنه ښودلې او زیاته کړې یې ده، چې په افغانستان کې  نږدې درې مېلیونه کسان د  قحطۍ په درشل کې دي.

نړۍوال بانک ویلي، په داسې حال کې چې نړۍ غواړي تر ۲۰۳۰ کال پورې لوږه صفر ته راټیټه کړي، خو د افغانستان ستونزې بېل تصویر وړاندې کوي.

نړۍوال بانک دغه راز ویلي، اقلیمي بدلونونه په افغانستان کې د خوراکي نا امنۍ یو اصلي لامل دی چې پر جګړه ‌ځپلي کرنیز اقتصاد یې جدي اغېز کړی دی.

جمهورخبري آژانس