د طالبانو مشر په لومړي ځل د عصري علوم پر اهمیت او ارزښت ټینګار کړی

د طالبانو مشر ملا هبت الله اخوند زاده په کندهار پوهنتون کې پر محصلینو غږ کړی، چې دیني او عصري علوم په اخلاص سره زده کړي.

د جمهور خبري آژانس د خبر له مخې د طالبانو د لوړو زدکړو وزارت وايي،‌ هبت‌الله اخوندزاده چارشنبه (د سلواغې ۲۴ مه) په لومړي ځل کندهار کې د پوهنتون د استادانو او محصلانو "یوه لویه غونډه کې" کې وینا کړې ده.
 

د دغه وزارت ویاند حافظ ضیا‌ءالله هاشمي پر اېکس پاڼه لیکلي، نوموړي په خپله وینا کې د علم پر ارزښت او د دیني او عصري زدکړو د اهمیت په اړه خبرې او استادانو او محصلانو ته لارښوونه کړې، چې دواړه علوم په اخلاص سره زده کړي.
 

هغه ویلي،«له تاسو څخه مو غوښتنه ده، چې د خپل هېواد د شهیدانو، مبارزینو او قهرمانانو تاریخونه ولیکئ او په نړیواله کچه یې معرفي کړئ؛ ځکه مجاهدینو په سختو حالاتو کې د الله تعالی په نصرت سره دا هېواد ازاد کړ او اوس ستاسو وار دی، چې د خپل علم او پوهي پر مټ افغانستان په نړۍ کې سیال کړئ او دومره زحمت وګالئ، چې بهرنيان دلته راشي، تاسو څخه زدکړه وکړي او د خپل علم په مرسته پر نړۍ حکمراني وکړئ.»