د طالبانو د ډلې د کرنې، اوبو لګولو او مالدارۍ سرپرست وزیر مولوي عطاءالله عمري د کمال خان بند څخه لیدنه کړې ده.
د جمهور خبري اژانس د راپور له مخې، د طالبانو ډلې تر کنټرول لاندې د کرنې، اوبو لګولو او مالدارۍ وزارت نن (شنبه، د سلواغې ۲۰ مه) په یوه بیان کې ویلي چې د دې وزارت سرپرست وزیر مولوي عطاءالله عمري د نیمروز ولایت د کمال خان بند په سیمه کې د اوبو لګولو کانالونو څخه لیدنه وکړه.
طالبانو ویلي چې په دې سفر کې د اوبو لګولو د سیسټم وضعیت، د کرنیزو ځمکو لپاره د اوبو ویش او په سیمه کې د کرنې په ښه کولو باندې د دې بند اغیزې وڅیړل شوې.
د طالبانو د کرنې سرپرست وزیر د اوبو سرچینو د اغیزمن مدیریت پر اهمیت ټینګار کړی او د نیمروز ولایت کې یې د کرنیزو تولیداتو او اقتصادي پراختیا په زیاتوالي کې د اوبو لګولو کانالونو رول مهم بللی دی.
طالبانو په سیمه ییزو چارواکو غږ وکړ چې د بند د اوبو د ښه کارولو او په سیمه کې د کرنې د پراختیا لپاره اغیزمن پروګرامونه پلي کړي.
جمهورخبري آژانس
