د طالبانو د دفاع وزارت اعلان کړی چې په کابل ښار کې یې یو شمېر وسلې او مهمات کشف او ضبط کړي دي.

د جمهور خبري اژانس د راپور له مخې، د طالبانو ډلې تر کنټرول لاندې د هیواد د ملي دفاع وزارت نن سهار (د سلواغې ۲۰مه) په یوه اعلامیه کې وویل چې د دې ډلې جنګیالیو د عملیاتي راپورونو پر بنسټ د لسمې امنیتي حوزې اړوند د قلعه فتح الله د اوومې سړک په سیمه کې یو شمیر وسلې او مهمات کشف او ضبط کړل.

طالبانو ویلي چې په دې کې ۶ کلاشینکوفونه، ۱۸ فرعي ماشیندارې، ۵۴۳ مرمۍ، ۳ فرعي ماشیندارې، یوه فرعي ماشینداره، او دوه د بدن زغرې شاملې دي.

طالبانو زیاته کړه چې یو شکمن کس هم د مهماتو سره نیول شوی او اړوندو چارواکو ته به وسپارل شي.

جمهورخبري آژانس