د روږدو د درملنې لپاره هر کال نږدې یو میلیارد افغانۍ لګول کیږي

له نشه‌يي توکو سره د مبارزې معین وایي، په کلني ډول د روږدو د درملنې لپاره  له یو میلیارد زیاتې افغانۍ ځانګړې کېږي.

د نشه یي توکو پر وړاندې د مبارزې معین د «اغوش» کمپ له نشې څخه رغېدلو کسانو د قرآن کریم د قرائت او تجوید د فراغت په مراسمو کې وایي، چې هر کال له کلنۍ بودجې څه باندې یو میلیارد افغانۍ د معتادانو لپاره ځانګړي کېږي.  

ملا عبدالحق اخند همکار زیاتوي چې د هېواد په ټولو ولایتونو کې د روږدو د درملنې لپاره مرکزونه شته.

د مسؤلینو په وینا، په دغو مراسمو کې څه باندې ۳۰ کسان د قرآن کریم د قرائت او تجوید له زده کړو فارغ شوي دي.
 
د نشه یي توکو پر وړاندې د مبارزې معین، ملا عبدالحق اخند همکار هم وايي: « پر دې ډېر غټ مصرف کیږي، تاسې به له دې خبر یاست په کلني ډول هر کال پر دغو وروڼو د اسلامي امارت له بودیجې تقریباً نږدې یو میلیارد افغانۍ لګښت راځي.»
  
د نشه یي توکو پر وړندې د مبارزې د معینیت مسلکي مرستیال، عبدالرحمان قاسمي وايي: «د نشه يي توکو بدې اغېزې یوازې پر فرد او کورنۍ نه وي، بلکې ټوله ټولنه تر تاثیر لاندې راولي. د ټولنې لپاره یې زیان تر کیمیاوي وسلې زیات دی.»  

له دې سره هممهاله، یو شمېر روږدي کسان چې له دغه روزنیز پروګرامه فارغ شوي، د خوښۍ په څرګندولو سره له نورو ځوانانو غواړي چې له نشه یي توکو ځانونه لېرې وساتي.  

جمهورخبري آژانس