د پکتيکا ولايت په برمل ولسوالۍ کې د پاکستان د هوايي بريد په غبرګون کې د طالبانو ډلې د دفاع وزارت ويلي چې دغه ډله به د پاکستان هوايي بريدونه بې ځوابه پرې نه ږدي.
د جمهور آژآنس د خبر له مخې د دغه هېواد د ملي دفاع وزارت چې د طالبانو تر کنټرول لاندې ده، نن چهارشنبه (د مرغومي ۵ مه) د یوې اعلامیې په خپرولو سره ویلي چې پرون ماښام د برمل په ولسوالۍ کې د پاکستاني پوځیانو له خوا بمباري شوې ده.
د پکتيکا ولايت برمل ولسوالۍ او دغه بمبار کې ملکي وګړي چې زياتره يې د وزيرستان کډوال دي، په نښه شوي او يو شمېر ماشومان او نور ملکي وګړي شهيدان او ټپيان شوي دي.
طالبانو ویلي چې دا وحشیانه عمل د ټولو نړیوالو اصولو او ښکاره تیري خلاف عمل بولي او په کلکه یې غندي.
طالبانو زیاته کړې چې پاکستاني لوري باید پوه شي چې دا ډول خپلسري کړنې د کومې ستونزې د حل لاره نه ده.
د طالبانو د دفاع وزارت ویلي، چې دغه بزدلانه عمل به بې ځوابه پرې نه ږدي، خو د خپلې خاورې او هویت دفاع یې د نه منلو وړ حق ګڼي.
د پاکستاني پوځ له لوري دا بریدونه په داسې حال کې کېږي چې تېره ورځ د افغانستان په چارو کې د پاکستان ځانګړی استازی صادق خان کابل ته راغی او له طالب چارواکو سره یې د همکارۍ او سیمه ییزې سولې په اړه خبرې وکړې.
جمهورخبري آژانس
