د طالبانو د ډلې اقتصادي مرستیال ملا عبدالغني برادر له یو شمېر هندي او بنګلادیشي عالمانو سره وکتل.
د جمهور آژآنس د خبر له مخې د طالبانو د ډلې د اقتصاد وزارت مرستیال ملا عبدالغني برادر پرون د لړم ۲۹ مه د خپل کار په دفتر کې له یو شمېر هندي او بنګالي عالمانو سره وکتل.
ملا برادر په دې کتنه کې وویل چې د طالبانو امارت تل هڅه کړې چې د اسلام دین له خرافاتو پرته په سمه بڼه خلکو ته ورسوي.
عبدالغني برادر ادعا وکړه، چې د طالبانو امارت د هېواد د اقتصادي وضعیت د ښه والي لپاره اغېزمنې هڅې پیل کړي او دغه سکتور لا ډېر پرمختګ کړی او له بهرنیو اړتیاوو څخه په پاک ځان بسیا اقتصاد ته یې زمینه برابره کړې ده.
د ملا برادر په وینا، د ملي شتمنیو مخنیوی او پر طالبانو اقتصادي بندیزونه د دې لامل شوي چې د افغانستان اقتصادي وده ټکنۍ شي.
دغه طالب زیاته کړه چې د طالبانو امارت د اسلامي شریعت په رڼا کې له نړۍ سره د متقابلو ګټو پر بنسټ سیاسي او اقتصادي اړیکې غواړي.
دغه راز په دې غونډه کې د يادو هېوادونو علماوو په افغانستان کې د طالبانو د حکومت له واکمنۍ څخه خوښي څرګنده کړه او د دغه نظام د پياوړتيا په اړه يې خپل نظرونه څرګند کړل.
جمهورخبري آژآنس
