اروزګان کې ترافیکي پېښه: ۸ تنه مړه شوي دي

د روزګان ولایت ځايي چارواکو ویلي، د ګیزاب ولسوالۍ پر لویه لار د مساپر وړونکي موټر د چپه کېدو له کبله لږترلږه اته تنه مړه شوي او یو سخت ټپي شوی دی.
 

د روزګان امنیتي مسؤلان وايي، پېښه نن (دوشنبه د لړم ۷ مه) شاوخوا دوه نیمې بجې رامنځ ته شوې ده.
 

د روزګان ولایت د اطلاعاتو او کلتور ریاست په یوه خبرپاڼه کې ویل شوي چې پېښه د سړک خرابوالي له کبله شوې.
 

ځینو چارواکو د لارې خرابوالي ترڅنګ د چلوونکو بې‌احتیاطي د پې‍ښې لامل بللی.
 

سرچینې وايي موټر له یوه پله څخه لوېدلی او پل هم نړېدلی دی.‌
 

ګیزاب د ترینکوټ شمال لوېدیځ شاوخوا ۱۱۰ کیلومترۍ کې پرته ولسوالي ده او لاره تر ډېره په غرونو کې ورغځېدلې ده.

جمهورخبري آژانس