د روسیې د بهرنیو چارو وزیر سرګي لاوروف په ټينګار سره ویلي، چې افغانستان کې سولې او تل پاتې ثبات لپاره د ټولو مخالفو لوریو تر منځ رښتینیو مذاکراتو ته اړتیا ده.
د
جمهور خبري آژانس د خبر له مخې لاوروف چې تاجکستان کې یوه خبري کنفرانس کې خبرې کولې و ویل، یوازې د مذاکراتو له لارې په افغانستان کې دایمي ثبات رامنځ ته کېدلی شي.
نوموړي افغانستان کې وروستۍ نښتې د اندېښنې وړ بللې وايي، د دې جدي اړتیا ده چې د افغانستان اوسنی حکومت له خپلو ټولو مخالفینو سره د مذاکراتو او خبرو لار خپله کړي.
د هغه په وینا طالبان باید یو ملي بحث پيل کړي او په دغه هېواد کې د ټولو سیاسي جریانونو له ګډون یو پیاوړی حکومت جوړ او دایمي ثبات ته لار جوړه کړي.
سرګي لاوروف همدا راز د افغانستان په مسئله کې پر دخیلو هېوادونو هم غږ کړی چې په افغانستان کې د سولې او مذاکراتو له لړۍ ملاتړ وکړي او له دغه هېواد سره د دایمي ثبات په راوستو کې همکاري وکړي.
د هغه په وینا د افغانستان ثبات د سیمې او روسیې لپاره مهم دی او تمه لري چې دلته روانې نښتې او بې ثباتۍ پای ته ورسېږي.
جمهورخبري آژانس:کابل