کندهاری ماشومه له څاه څخه ژوندی را ایستل شو

د کندهار سیمه ییز چارواکي وايي، د دغه ولایت په خاکریز ولسوالۍ کې یو ماشومه چې په یوه څاه کې لوېدلی و، له ۲۲ ساعتونو وروسته له څاه څخه ژوندی را ایستل شوی دی.
 
د جمهور خبري آژانس د خبر له مخې؛ د کندهار د والي وياند مولوي محمود عزام د سه شنبې په ماښام د يوې اعلاميې په خپرولو سره ویلي، دغه ماشومه له يوې څاه څخه له را ايستلو وروسته د درملنې لپاره د کندهار روغتون ته وړل شوى دى.
 
د خاکریز ولسوالۍ لپاره د طالبانو مرستیال ولسوال مطیع الله هم ویلي، چې د سیمه ییزو چارواکو او ژغورونکو ډلو د ګډو هڅو په پایله کې یو اووه کلنه ماشومه له یوې ژوندۍ څاه څخه را ایستل شوی دی.
 
د هغه په ​​وينا، دا مهال د دغه ماشوم روغتيايي حالت د ډاډ وړ دى.

 دا ماشومه پلازو نومیږي او د یوې کوچي کورنۍ لور ده چې د دوشنبې په ماښام د کندهار د خاکریز ولسوالۍ د لالک وازرک په سیمه کې په یوه څاه کې ولوېده.

د يادونې وړ ده، چې تېره ورځ هم د هلمند په نوزاد ولسوالۍ کې يو ماشوم له څاه څخه ژوندى را ايستل شوى و.

تر دې مخکې په زابل ولایت کې په یوه څاه کې غورځېدلی ماشوم د ژغورنې عملیات له درې ورځو او شپو وروسته په کوهي کې مړه شوي وو.
 
جمهر خبري آژانس – کابل