ملګرو ملتونو د افغانستان له ګاونډیو هېوادونو غوښتي، چې په خپلو پولو کې پر افغان کډوالو فشارونه پای ته ورسوي او سختي ورسره ونه کړي.
د
جمهور خبري آژانس د خبر له مخې د کډوالو په چارو کې د ملګرو ملتونو عالي کمېشنرۍ ویلي، د افغانستان ګاونډي هېوادونه لکه پاکستان، ایران او تاجکستان دې پر افغان کډوالو فشارونه او سختۍ ودروي او خپلې پولې د دوی پر مخ خلاصې کړي.
سرچینې زیاته کړې، په وروستیو کې د افغانستان د ګاونډیو هېوادونو له لوري د کډوالو ایستل ډېر شوي چې دا مسله د اندېښنې وړ ده او یاد هېوادونه دې له دغه چارې لاس په سر شي.
د کډوالو عالي کمېشنرۍ دغه راز له مرستندویه هېوادونو غوښتي چې له کډوالو او بېځایه شوو سره مرستې وکړي او د زرګونه افغانانو ژوند وژغوري.
د یادونې ده، چې واک ته د طالبانو له رسېدو سره سم په میلیونو افغانانو له هېواد څخه وتلو ته مخه کړې، چې ډېری یې وتلي او نور هم د وتو په حال کې دي.
جمهورخبري آژانس:کابل