د افغانستان لپاره د امریکا ځانګړي استازي توماس وېسټ له ګڼو برېټانوي چارواکو سره لیدلي دي او د افغانستان د روان وضعیت په اړه یې ورسره خبرې کړې دي.
د جمهور آژانس د خبر له مخې وېسټ وایي، په دې لیدنه کې ټینګار شوی چې نړیواله ټولنه باید له افغانستان سره بشردوستانه مرستې ډېرې کړي او تر څنګ یې د دغه هېواد د امنیتي وضعیت او راتلونکې په اړه هم بحثونه شوي دي.
نوموړي زیاته کړې، چې په دې سفر کې یې د افغانستان لپاره د برېټانیا له ځانګړي استازي او د برېټانیا د پوځ له لوی درستیز جنرال نیک کارټر سره کتلي دي.
په دې لیدنه کې دغه راز ټینګار شوی دی چې په افغانستان کې د بشردوستانه مرستو د رسولو او امنیتي مسایلو په اړه یو نړیوال اتحاد رامنځ ته شي او له دغه هېواد سره دې اړینې مرستې وکړي.
د یادونې ده، چې ټام ویسټ څو ورځې وړاندې د زلمي خلیلزاد پر ځای د افغان سولې لپاره د امریکا ځانګړی استازی وټاکل شو.
نوموړی هم د افغان سولې خبرو کې سهیم و، چې د افغانستان په اړه معلومات لري.
ویټ تر ټاکل کېدو وروسته بروکسل کې خبریالانو ته افغانستان کې د داعش د فعالیت په اړه اندېښنه څرګنده کړه او ویې ویل امریکا له خپلو متحدینو سره د طالبانو د حکومت په رسمیت پېژندلو د نقشې پر لارو چارو خبرې اترې کوي.
جمهورخبري آژانس:کابل
