ننګرهار کې درې مېرمنې وژل شوې دي

سیمه ییز چارواکي وايي، ننګرهار ولایت کې درې مېرمنې په مرموز ډول وژل شوې چې یوه یې مور او دوه یې لوڼې دي.

د جمهور خبري آژانس د خبر له مخې پېښه پرون شنبې د غبرګولي ۱۵ مه ماښام مهال د جلال آباد ښار د اومې ناحیې په چکنور سیمه کې رامنځ ته شوې ده.

د ننګرهار د والي ویاند عطاالله خوږیاڼی وايي، د وژل شویو مېرمنو عمرونه د ۲۵ او ۵۰ کلونو تر منځ دي، چې یوه پکې مور او دوه یې لوڼې دي.

دی وايي، د پېښې لامل کورنۍ ستونزې دي خو په اړه یې څېړنې روانې دي.

د والي ویاند زیاتوي، چې د پېښې په تړاو یو تن نیول شوی او د نورو د نیولو هڅې هم روانې دي.

دا په داسې حال کې ده، چې څو ورځې وړاندې هم د همدې ولایت د مومند درې ولسوالۍ یوه اوسېدونکي خپل پلار د خسر په همکارۍ په دوربابا ولسوالۍ کې په چاړه حلال کړی وو.

جمهورخبري آژانس:ننګرهار