افغان ولسمشر محمد اشرف غني هرات ولایت کې شوی موټر بم برید په کلکو ټکو غندلی وايي، د طالبانو له خوا ترهګریز بریدونه وضعیت لا پېچلی کوي.
د جمهور آژانس د خبر له مخې ښاغلي ارګ په یوه خبرپاڼه کې د ولسمشر غني له قوله ویلي، طالبانو د ولسونو پر ضد د خپلې نامشروع جګړې او تاوتریخوالي ته دوام ورکړی دی.
ښاغلی غني وايي، طالبانو په دې برید سره یو ځل بیا وښوده، چې نه یوازې په سوله ییز او اساسي ډول د روان ناورین د حل وړتیا او د جګړې د پایته رسولو اراده نه لري، بلکې وضعیت لا پېچلی او د سولې برابر شوی فرصت ضایع کوي.
ولسمشر ویلي، د طالبانو ډله او د دوی ملاتړي دې دا درک کړي چې په ملکي خلکو او عامه تاسیساتو د بریدونو له لارې د دوی پر وړاندې د خلکو له زیاتېدونکې کرکې مه واره بل هېڅ هم نشي ترلاسه کولای.
نوموړي ټینګار کړی، چې طالبان او ملاتړي یې د خپلو وحشتونو له امله د خدای تعالی او ملت پر وړاندې مسوول او مختوري دي.
ښاغلي غني د پېښې د شهیدانو کورنیو ته د خپلې ژورې خواخوږۍ مراتب څرګند کړي او اړوندو مسوولینو ته د ټپیانو د درملنې، د قربانیانو کورنیو ته د رسیدګي، د پېښې د څرنګوالي د ارزونې او د عاملینو د مجازاتو لارښوونه کوي.
د یادونې ده چې تېره شپه ۸ بجې د هرات ښار د ۱۴ مې حوزې اړوند سیمه کې ټونس موټر بم برید وشو، چې له امله یې ۸ تنه وژل شوي او ۴۷ نور ټپیان دي.
سرچینې وايي، په وژل شویو کسانو کې یو نظامي، په ټپیانو کې ۸ تنه پولیس او نور ټول ولسي وګړي دي.
چارواکو د برید پړه پر طالبانو اچولې خو طالبانو تر اوسه غبرګون نه دی ښودلی.
جمهورخبري آژانس:کابل
