د ولسمشر لومړی مرستیال امرالله صالح وايي، ملي امنیت هغه درې تنه ترهګر نیولي، چې غوښتل یې یو مدني فعال ترور کړي.
د جمهور آژانس د خبر له مخې ښاغلي صالح نن دوشنبې د سلواغې ۶ مه د شپږنیمو تر امنیتي غونډې وروسته په خپله فسبوک پاڼه دا خبره کړې ده.
نوموړي ویلي، چې دغه درې تنه ترهګر پرون د کابل ښار د څلورمې ناحیې اړوند سیمه کې د ملي امنیت ځواکونو له خوا بالفعل نیول شوي دي.
د هغه په وینا دغه درې تنه ترهګرو غوښتل، چې د بې غږه تومانچې په واسطه یو مدني فعال ترور کړي، چې باالفعل د ملي امنیت ځواکونو له خوا ونیول شول.
ښاغلي صالح د دغه درې ترهګرو د هویت او مدني فعال په اړه نور معلومات نه دي ورکړي، خو ټینګار یې کړي، چې د دغه ترهګرو د سازمان د شجرې موندلو لپاره هڅې دوام لري.
دی وايي، په پلټنو کې به دا هم معلومه شي، چې دغه ترهګرو د دوه ښځینه قاضیانو قدسیې او ذکیې په قتل کې هم لاس درلود که نه.
ښاغلی صالح د غلکچي بریدګرو د نیولو کېدو خبر پر داسې مهال کوي، چې په دې وروستیو کې پلازمېنه کابل کې د مدني فعالانو، خبریالانو، څارنوالانو، قاضیانو او نورو حکومتي کارکوونکو او ملکي وګړو هدفي وژنې زیاتې شوې دي.
قاضي قدسیه او قاضي ذکیه د سترې محکمې هغه دوه کارکوونکې وې، چې تېره اوونۍ دندې ته په لار د کابل ښار په تایمني سیمه کې د موټر سایکل سپرو وسله والو له خوا په ډزو و وژل شوې.
جمهورخبري آژانس:کابل
