ترکیې په افغانستان کې وروستي موټر بم بریدونه په کلکه غندلي او وروستی تاوتریخوالی یې خورا بوږنونکی بللی دی.

د جمهورخبري آژانس د خبر له مخې د ترکیې د بهرنیو چارو وزارت غزنی کې پروني موټر بم برید ته په اشارې وايي، په افغانستان کې د روانې جګړې ژر پای ته رسېدو او بېړني اوربند ته اړتیا ده.

په خبرپاڼه کې د غزني برید غندل شوی او هیله یې ښودلې، چې طالبان او افغان حکومت وکړی شي ژر تر ژره دایمي اوربند ته ورسېږي.

په غزني کې پرون د افغان پوځ په یوه مرکز موټر بم برید وشو، چې تر ۴۰ تنو په کې وژل شوي او کابو ۳۰ تنه ټپیان شوي دي.

د یادونې ده، چې ترکیې تر دې وړاندې هم د افغان سولې له بهیر سره د بشپړې همکارۍ او ملاتړ ژمنه کړې ده.

جمهورخبري آژانس:کابل