د مالیزیا د اسلامي یووالي ټولنې په افغانستان کې روانه جګړه ناروا او د اسلامي شریعت ضد بللې ده.
د
جمهور خبري آژانس د خبر له مخې د افغانستان د بهرنیو چارو وزارت د مالیزیا د دغه دریځ هرکلی کړی وايي، مالیزیا افغانستان کې د جګړې او تاوتریخوالي دوام غندلی دی.
د بهرنیو چارو وزارت په خبرپاڼه کې ویل شوي، د مالیزا د اسلامي یووالي ټولنې نه یوازې دا جګړه او تاوتریخوالی غندلی، بلکې هغه یې مطلق حرام او د اسلامي شریعت سره په ټکر کې بللی دی.
یادې اسلامي ټولنې له افغان دولته د یو لیک له لارې غوښتنه کړې چې د افغانستان ناورین ته باید د خبرو اترو او مذاکراتو له لارې د پای ټکی کېښودل شي.
د یادونې ده، چې تر دې وړاندې د افغانستان او بنګله دېش دیني عالمانو هم په افغانستان کې روانه جګړه حرمه او مسلمان وژنه وبلله.
یادو دیني علمانو د جګړې له ښکیلو خواوو غوښتنه وکړه، چې جګړه ودروي او د خبرو اترو له لارې تل پاتي اوربند او سولې ته ځان ورسوي.
دغو دیني عالمانو په قطر کې د بین الافغاني مذارکراتو ملاتړ وکړ او په افغانستان کې یې د بې ګناه مسلمانانو په نه وژل کېدو ټينګار کړی دی.
افغان دیني عالمانو دا جګړه یوازې د قدرت او څوکۍ تر لاسه کولو جګړه وبلله، چې په وینا یې هېڅ جواز نه لري.
جمهورخبري آژانس:کابل