د افغان سولې لپاره د امریکا ځانګړي استازي زلمي خلیلزاد ویلي، چې د افغان سولې د بریا لپاره د سیمه ییزو هېوادونو او قدرتونو همکاري خورا اړینه ده.
د
جمهور خبري آژانس د خبر له مخې خلیلزاد چې د افغان سولې په تړاو هند ته تللی او هندي چاروکو سره یې خبرې کړې په تازه مرکه کې ټینګار کړي، چې نړیوال باید د افغان سولې له روانې پروسې سره پوره همکاري وکړي.
نوموړي زیاته کړې چې هند ته یې د سفر موخه دا وه چې د افغان سولې په برخه کې ددغه هېواد اندېښنې کمې کړي او د روان بهیر په اړه معلومات ورکړي.
خلیلزاد ټینګار کړي، چې له افغان سولې سره د سیمه ییزو هېوادونو او قدرتونو همکاري خورا مهمه ده او امریکا له ټولو اړخونو سره خبرې کوي څو د سولې له روان بهیر ملاتړ وکړي.
د هغه په وینا د ټولو هدف دا دی چې افغانستان یو ځل بیا د ترهګرو په ځاله بدل نه شي، نو ټولو ته په کار ده چې دغه ګډ هدف ته د رسېدو لپاره هڅه وکړي.
جمهورخبري آژانس:کابل