افغان ځانګړو ځواکونو غوښتل پر جنسي ځورونې تورن د افغانستان د فوټبال فدراسیون پخوانی مشر کرام الدین کریم ونیسی، خو د سیمې د خلکو له غبرګون سره مخ شول.
د جمهور آژانس د خبر له مخې د پولیسو ځانګړي ځواکونه د ځمکې او هوا له لارې تېره شپه پنجشېر ولایت ته چېرته چې کریم اوسي تللي و تر څو هغه ونیسي.
خو د هغه د عملیاتو پر مهال د پنچشېر ولایت د بازارک د سیمې خلک د کریم په پلوی راوتلي او له افغان ځواکونو سره یې ان نښته هم کړې ده.
ځايي چارواکي هم تاییدوي، چې ځانګړي ځواکونه د فوټبال فدراسیون د پخواني مشر کرام الدین کریم د نیولو لپاره ورغلي و، خو د هغه په نیولو نه دي بریالي شوي.
د پنجشېر ولایت مرستیال والي محمد امین صدیقي وایي، دغه عملیات له دوی سره په نه همغږۍ تر سره شوي او دا مهال د سیمې شاوخوا دوه سوه کسانو، چې کابو ټول یې وسلې لري ځانګړي ځواکونه ایسار کړي دي.
دی وايي، د پنجشر د ځواکونو د همغږۍ له مرکز څخه بازارک سیمې ته یو شمېر سرتېري لېږل شوي، تر څو د سیمې قهرجن خک ارام کړي او ایسار سرتېري ترې راخوشي کړي.
په ورته وخت کې ځینې سرچینې وايي، دا چې د سیمې خلکو لار بنده کړې وه، نو ځانګړي ځواکونه د خاواک کوتل له لارې د بغلان اندراب ته وتلي دي.
کورنیو چارو وزارت تر اوسه د عملیاتو په اړه معلومات نه دي ورکړي.
د افغانستان د فوټبال فدراسیون پخوانی رئيس کرامالدین کریم د انجونونو د فوټبال د ملي لوبډلې د غړو په جنسي ځورونې تورن دی.
د افغانستان د انجونو د فوټبال د ملي لوبډلې پخوانۍ کپتانې خالدې پوپلزۍ د لومړي ځل لپاره د ۲۰۱۸ په نوامبر کې له ګارډین ورځپاڼې سره په مرکه کې ښاغلي کریم تورن کړ چې د فوټبال پر یوشمیر لوبغاړو یې جنسي تیری کړی، خو نوموړي دا ادعاوې رد کړي دي.
تیره میاشت افغان ولسمشر محمداشرف غني د پنجشیر ولایت له اوسېدونکو څخه وغوښتل چې کرامالدین کریم له دغه ولایت څخه وشړي ترڅو قانون ورباندې تطبیق شي.
جمهورخبري آژانس:کابل
