تر ننګرهار وروسته افغان ځواکونو په پکتیا او کندهار ولایتونو کې هم ډېورنډ فرضي کرښې ته څېرمه پوځي تمرینات کړي دي.
د جمهور آژانس د خبر له مخې دغه تمرینات نن او پرون شنبې د زمري ۲۵ مه تر سره شوي، چې په کې، پلیو، کمانډو، ضربتي، پوله ساتو او خوايي ځواکونو برخه درلوده.
پکتیا کې پوځي تمرینات د دغه ولایت د اریوب ځاځي ولسوالۍ اړوند د مڼې جبې په سیمه کې تر سره شوي دي، چې پر مهال یې د د وسله وال پوځ د ستر درستيز درستيزوال ډګر جنرال حبيب حصاري، د ۲۰۳ تندر قول اردو تورنجنرال ارکان حرب خان الله شجاع او د ملي دفاع وزارت يو شمېر نورو جنرالانو او آفسرانو هم حضور درلود.
د تمریناتو د مراسمو پر مهال ډګرجنرال حبيب حصاري و ویل، چې د افغان امنيتي ځواګونو ګډ تمرينات د افغاستان دوستانو او دښمنانو ته پيغام لري.
بل خوا د افغانستان د ملي امنیت شورا ویاند جاوید فیصل پر خپل ټوېټر پاڼه د یوې ویډیو په خپرولو سره ویلي، افغان امنیتي ځواکونو د کندهار په سپین بولدک ولسوالۍ کې د لوی اختر په شپه په سپین بولدک کې د پاکستان لخوا د شهید شوو افغان سرتیرو په نوم پوځي تمرینات تر سره کړل.
د ملي دفاع وزارت د معلوماتو له مخې په دغه تمریناتو کې هوايي او ځمکنی ځواک برخه لري.
چارواکي وایي، د دې تمریناتو موخه دا ده چې په سیمه کې د غیر قانوني اقداماتو پر وړاندې تیاری ونیسي او د احتمالي خطر پر وړاندې چمتو وي.
تر دې يوه ورځ مخکې د افغانستان ملي دفاع وزات د ننګرهار په ګوشتې ولسوالۍ کې ډيورنډ کرښې ته نږدې د افغان ملي امنيتي او دفاعي ځواکونو د ګډو نظامي تطبيقاتو د ترسره کيدو خبر ورکړ و.
افغانستان د وسله وال پوځ لوی درستیځ جنرال محمد یاسین ضیاء د دغه نظامي تطبیقاتو څخه د لیدنې پرمهال ویلي چې افغان دفاعي او امنیتي ځواکونه مسلکي او جنګي لوړ ظرفیت لري.
ښاغلي ضیاء ویلي و چې افغان دفاعي ملي امنیتي ځواکونه د ځمکنۍ بشپړتیا او بهرني او داخلي دښمانانو په وړاندې په خپلواکه توګه دفاع کولای شي.
جمهورخبري آژانس:کندهار
