طالبانو د ملکی وګړو د مرګ ژوبلې په اړه د یوناما راپور رد کړ

وسله والو طالبانو تازه په یوه اعلامیه کې د ملکي مرګ ژوبلې په اړه د یوناما وروستی راپور رد کړی او هغه یې بې اساسه بللی دی.

د جمهور خبري آژانس د خبر له مخې طالبانو په یوه خبرپاڼه کې ویلي، یاد راپور د امنیتي ارګانونو د معلوماتو په اساس ترتیب او خپور شوی، چې په خبره یې په واقعي بڼه د ملکي مرګ ژوبلې قضيې نه دي په کې په ګوته شوي.

طالبانو دغه راز یو ځل بیاپه هېواد کې د ملکي مرګ ژوبلې اصلي او عمده عامل په کلیو، کورونو او ملکي ځایونو باندې د افغان ځواکونو بمبارۍ یادې کړې.

دوی په خپله خبرپاڼه کې د هلمند ولایت د سنګین ولسوالۍ وروستۍ پېښه یې د بېلګې په توګه یاده کړې ده.

د یادونې ده، چې وړاندې تر دې یوناما دفتر د ملکي مرګ ژوبلې په اړه خپل وروستي راپور کې د ملکي تلفاتو زیاته پړه پر طالبانو اچولې وه.

یوناما ویلي، په تېرو ۶ میاشتو کې کابو ۴ زره ملکي افغانانو ته مرک ژوبله اوښتې، چې ډېر مسوول یې طالبان دي.

دغه راز ناټو هم ویلی، چې په افغانستان کې د ملکي تلفاتو ډېر مسوولیت طالبانو ته متوجه دی او دغه ډله باید تاوتریخوالی نور ودروي.

جمهورخبري آژانس: کابل