زابل کې ماین چاودنې ۱۲ تنو ته مرګ ژوبله اړولې ده

کورنیو چارو وزارت تاییدوي، چې زابل ولایت کې د سړک د غاړې ماین چاودنه کې ۱۲ تنو ولسي وګړو ته مرګ ژوبله اوښتې ده.

د جمهور خبري آژانس د خبر له مخې د یاد وزارت ویاند طارق ارین وايي دغه پېښه پرون ناوخته د زابل ولایت میزانې ولسوالۍ کې رامنځ ته شوې ده.

د هغه په وینا د سړک د غاړې ماین د ولسي وګړو په ټونس موټر چاودلی، چې له امله یې د دوه ماشومانو په ګډون څلور تنه وژلي او ۸ نور ټپیان شوي دي.

د زابل د والي ویاند وايي، ماین طالبانو اېښی و، چې قرباني یې ټول ښځې، ماشومان او نارینه ملکي وګړي دي.

بلخوا د افغانستان د کورنیو چارو وزارت په یوې بلې اعلامیې کې هم ویلي په زابل ولایت کې یوه شپږ کسیزه ډله چې په ماین جوړولو مصروفه وه د خپل ماین په چاودنه کې وژل شوي دي.

وسله وال وطالبانو تر اوسه په دې اړه څه نه دي ویلي.

جمهورخبري آژانس:کابل