د ملي دفاع وزارت ویاند فواد امان وايي، پکتیا ولایت کې د افغان ځواکونو او وسله والو طالبانو تر منځ نښته کې ۱۴ طالبانو ته مرګ ژوبله اوښتې ده.
د
جمهور خبري آژانس د خبر له مخې نوموړي ویلي، نن شنبې د غوايي ۲۷ مه د مچلغو بند په سیمه کې د افغان ځواکونو او طالبانو ترمنځ نښته شوې ده.
د هغه په وینا د نښتې پر مهال افغان هوايي ځواک پر طالبانو برید کړی ۹ تنه یې ترې وژلي او ۵ نور یې ټپیان کړي دي.
د ملي دفاع وزارت ویاند زیاتوي، چې په دغه نښته کې دوه افغان سرتېري هم تپیان شوي دي.
طالبانو تر اوسه په دې اړه څه نه دي ویلي.
د یادونې ده، چې کابل، ننګرهار، لغمان او پکتیا کې تر خونړیو بریدونو وروسته چې کله ولسمشر غني افغان ځواکونو ته له دفاعي حالت څخه د وتو امر وکړ، ورسره سم پر وسله والو د افغان ځواکونو بریدونه هم زیات شوي دي.
د ملي دفاع وزرات د معلوماتو له مخې یوازې په تېره شپه او ورځ کې په هلمند او اروزګان ولایتونو کې د افغان ځواکونو په عملیاتو کې تر ۷۰ زیاتو طالبانو ته مرګ ژوبله اوښتې ده.
جمهورخبري آژانس:کابل