ملي دفاع وزارت په کندهار او اروزګان ولایتونو کې د افغان ځواکونو د عملیاتو پر مهال د ۴۲ وسله والو طالبانو د مرګ ژوبلې خبر ورکړی دی.
د جمهور آژانس د خبر له مخې دفاع وزارت نن چهارشنبې د لړم ۲۹ مه خپره کړې خبرپاڼه کې ویلي، د طالبانو پر ضد دغه ځمکني او هوایي عملیات د کندهار په میوند او اروزګان په ګیزاب ولسوالیو کې تر سره شوي دي.
سرچینه زیاتوي، چې د کندهار په میوند ولسوالۍ کې د افغان ځواکونو په عملیاتو کې ۱۹ وسله وال طالبان وژل شوي او ۱۴ نور ټپیان شوي دي.
دغه راز سرچینه زیاتوي، چې په دې عملیاتو کې د دښمن ۱۱ پټنځایونه هم له منځه وړل شوي او یو میل دهشکه یې افغان ځواکونو تر لاسه کړې.
په ورته وخت کې خبرپانه وایي، د اروزګان ګیزاب کې بیا د کمانډو ځواکونو عملیاتو کې ۴ وسله وال وژل شوي او پنځه نور ټپيان شوي دي.
دفاع وزارت د کندهارر په میوند، خاکریز، شاولي کوټ او د اروزګان په ګیزاب او دهراود کې د ۴۸ کړۍ ماینونو د کشف او شنډولو خبر هم ورکړی دی.
طالبانو تر اوسه په دې اړه غبرګون نه دی ښودلی.
جمهورخبري آژانس:کابل
