شمال کې د پوځ چارواکي وايي، افغان هوايي ځواکونو فاریاب ولایت کې د وسله والو طالبانو د روزنې یو مرکز په نښه او له منځه وړی دی.
د جمهور آژانس د خبر له مخې ۲۰۹ شاهین قول اردو نن یکشنبې د وږي ۲۴ مه خپره کړې خبرپاڼه کې ویلي، افغان هوايي ځواکونو پرون د فاریاب د ګرزیوان ولسوالۍ په دره شاخ سیمه کې د طالبانو پر مرکز برید وکړ.
سرچینه زیاتوي، چې په دغه هوايي برید کې د طالبانو یو پاکستانۍ او یو هلمندۍ روزونکي حنظله او ملا امان الله له ۷ طالبانو یو ځای وژل شوي دي.
دغه راز خبرپاڼه زیاتوي په برید کې د دوه قوماندانانو قاري سنت الله او ملا رحمت په ګډون ۱۲ نور طالبان ټپیان شوي هم دي.
۲۰۹ شاهین قول اردو زیاته کړې، چې د طالبانو دغه روزنیز مرکز دوه اوونۍ وړاندې د دوی د مشرانو له خوا جوړ شوی وو چې ډېر ژر د افغان ځواکونو له خوا تثبیت او برید پرې وشو.
طالبانو تر اوسه په دې اړه څه نه دي ویلي.
جمهورخبري آژانس:کابل
