جنرال میلر: ځواکونو ته مو د عملیاتو درولو امر نه دی شوی
سی شنبه ۲۲ اسد ۱۳۹۸ ساعت ۱۴:۲۲
افغانستان کې د بهرنیو ځواکونو عمومي قوماندان جنرال سکاټ مېلر وایي، په عملیاتو کې یې هېڅ ډول محدویت نه دی راغلی.
افغانستان کې د بهرنیو ځواکونو عمومي قوماندان جنرال سکاټ مېلر وایي، په عملیاتو کې یې هېڅ ډول محدویت نه دی راغلی.
جنرال سکاټ میلر په دې بیان کې هغه راپورونه رد کړل چې پر اساس یې ویل شوي وو چې په افغانستان کې مېشتو امریکايي پوځیانو ته امر شوی چې د طالبانو پر ضد عملیات ودروي.
تېره شپه امریکايي مجلې نیوزویک د خپل هیواد د دفاع وزارت د بې نومو چارواکو په قول وویل چې په افغانستان کې مېشتو امریکايي ځواکونو ته امر شوی چې د طالبانو پرضد تقریباً ټول عملیات ودروي او افغان امنیتي – دفاعي ځواکونو ته سلامشوره هم تم کړي.
خو جنرال میلر وايي چې دا راپور حقیقت نه لري او د دوی په عملیاتي چارو کې هیڅ راز بدلون نه دی راغلی.
ده همداراز ویلي، دا خبر د اوازو پر اساس خپور شوی او دوی ته هیچا نه دي ویلي چې یا عملیات ودروي یا یې محدود کړي.
نیوزویک د امریکا د دفاع وزارت د چارواکو په قول همداراز وايي چې د ولسمشر ټرمپ حکومت غواړي چې له افغانستانه په لومړي ګام کې نژدې نیمايي پوځیان (۶۰۰۰) وباسي.
تر دې پخوا واشنګټن پوست او نورو امریکايي رسنیو د خپلو باوري سرچینو په قول ویلي وو چې امریکا به د ۸ زره او ۹ زره ترمنځ ځواکونه له افغانستانه وباسي.
جمهورخبري آژانس:کابل
د مطلب کود: 119355
