د سولې موافقه کې به د اوربند او افغانستان له استازو سره خبرې شاملې وي

په قطر کې د طالبانو د دفتر ویاند سهیل شاهین ویلي، له امریکا سره د سولې په موافقه کې به اوربند او د افغانستان له استازو سره د طالبانو خبرې شاملې وي.

د جمهور خبري آژانس د خبر له مخې شاهین دغه څرګندونې پرون جمعه د زمري ۱۸ مه ساوشېټېډ پرس خبري آژانس سره خبرو کې کړې دي.

سهیل شاهین زیاته کړې، چې له امریکا د سولې خبرو کې پرمختګ شوی دی او تمه ده، چې د دې دور په پای کې به موافقه نهايي او تړون به لاسلیک شي.

نوموړي د توافق لیک په اړه نور جزیات نه دي ورکړي، خو ټینګار یې کړې، چې په موافقه کې به اوربند او د افغانستان له استازو سره د طالبانو خبرې شاملې وي.

شاهین په دې اړه هم جزیات نه دي ورکړي، چې د افغانستان له استازو یې موخه د افغان حکومت له رسمي استازو سره خبرې دي که نور سیاسیون.

خو وړاندې تر دې طالبانو ویلي، چې په بین الاافغاني خبرو کې به د کابل له ادارې سره د حکومت په حیث نه بلکې، د فردي سیاسیون په شان خبرې کوي.

په ورته وخت کې ویل کېږي، چې د طالبانو او امریکا تر منځ خبرې نهايي شوي او د موافقه لیک یوه کاپي افغان حکومت ته هم رسېدلې.

خو ولسمشرۍ ماڼۍ دا خبره رد کړې، چې ګڼې د امریکا او طالبانو تر منځ د سولې موافقه نهايي شوې ده.

د ولسمشر ویاند صدیق صدیقي ویلي، د سولې په تړاو ټول جزیات له افغان حکومت سره شریک شوي خو د امریکا او طالبانو موافقه نهايي شوې نه ده.

جمهورخبري آژانس:کابل