د کابل ښار د شپاړسمې امنیتي حوزې اړونده سیمه کې د موټر بم چاودنې له رامنځ ته کېدو وروسته د امنیتي ځواکونو او وسله والو تر منځ نښته روانه ده.
د
جمهور خبري آژانس د خبر له مخې دغه چاودنه نن دوشنبې د چنګاښ ۱۰ مه سهار ۹:۵۰ بجې د کابل ښار د شپاړسیمې امنیتي حوزې اړوند د پل محمود خان په سیمه کې رامنځ ته شوې ده.
ویل کېږي، چاودنه په یاده سیمه کې د پوځ په یوه مرکز شوې، چې د ځينو سرچینو په وینا د دفاع وزارت د وسلو د تخنیکي پر ریاست جګړه روانه ده.
ځینې سرچینې وایي، په دغه سیمه کې درې پرلپسې چاودنې شوې، چې د یادې سیمې اوسېدونکو ته یې ګڼه مرګ ژوبله اړولې ده.
په دغه سیمه کې یو خصوصي ښوونځی هم شتون لري، چې د ښوونځي د ښوونکو په وینا تر ۵۰ پورې زده کوونکي د چاودنې له امله ټپیان شوي.
په همدې حال کې عیني شاهدان وایي، ایمرجنسي روغتون ته تر اوسه پورې د یوه ماشوم جسد او ۳۵ ټپیان وروړل شوي، چې ډېری یې ماشومان او د ښوونځي زده کوونکي دي.
خو د عامې روغتیا وزارت وایي، تر اوسه پورې ۶۵ ټپیان روغتونو ته وړل شوي او دا مهال په سیمه کې د بریدګرو او امنیتي ځواکونو تر منځ نښته روانه ده.
کورنیو چارو وزارت هم په سیمه کې د درنې چاودنې او وسله والې نښتې تایید کړی خو تر اوسه یې د مرګ ژوبلې په اړه معلومات نه دي ورکړي.
د دغه وزارت ویاند نصرت رحیمي وایي، لومړی د یوه موټر په واسطه چاودنه شوې او وروسته څو تنه وسله وال یوې ودانۍ ته ختلي او له امنیتي ځواکونو سره په جګړه بوخت دی.
د هغه په وینا سیمې ته ځانګړي ځواکونه رسېدلي او ډېر ژر به وسله وال له منځه یوسي.
خو ځینې عیني شاهدان وايي، چاودنه د میني بس موټر په وسیله وشوه او دا مهال سیمې ته ځانګړي امنیتی ځواکونه رسېدلي دي.
د برید مسوولیت وسله والو طالبانو پر غاړه اخیستی او ویلي یې دي، چې د دوی څو تنو ځانمرګو بریدګرو د ملي دفاع وزارت د وسلو د تخنیک پر ریاست برید کړی، خو نور جزیات یې نه دي ورکړي.
د خبر بشپړ جزیات وروسته....
جمهورخبري آژانس:کابل