بګرام کې پر امریکايی ځواکونو تر برید وروسته د امریکا د بهرنیو چارو وزیر مایک پمپیو ویلي ترهګریز بریدونه د افغان سولې لپاره د امریکا روانې هڅې نه شي زیانمنولی.
د
جمهور خبري آژانس د خبر له مخې پرون دوشنبې د وري ۱۹ مه ماښام مهال څه باندې پنځه بجې افغانستان کې بګرام اډې ته څېرمه پر امریکايي ځواکونو چاودنه شوه.
ځايي چارواکو ویلي و دا ځانمرګی برید وشو، چې د امریکايي ځواکونو په کاراون شوی خو افغانستان کې مېشت امریکايي ځواکونو ویلي د سړک د غاړې ماین چاودنه وه.
افغانستان کې مېشتو امریکايي ځواکونو ویلي په دغه چاودنه کې د یوه قراداري په ګډون څلور امریکايي پوځیان وژل شوي او درې نور ټپیان شوي دي.
د برید مسوولیت وسله والو طالبانو پر غاړه اخیستی دي.
د امریکا د بهرنیو چارو وزارت دغه برید په کلکه غندلی او دا یې یوه خواشنوونکې پېښه بللې ده.
د بهرنیو چارو وزیر مایک پمپیو ویلي امریکايي ځواکونه په افغانستان کې د امریکا د امنیت لپاره حضور لري او دوی هڅه کوي، چې دغه هېواد ته ثبات راولي.
مایک پمپیو ټینګار کړی، چې ترهګریز بریدونه د افغان سولې لپاره د امریکا پر روانو هڅو اغېز نه شي کولی.
د امریکا د بهرنیو چارو وزیر وايي دوی هڅه کوي چې د افغانستان د سولې مذاکرات یوې پایلې ته ورسېږي او په دغه هېواد کې دایمي سوله او ثبات راشي.
جمهورخبري آژانس:کابل