د افغان حکومت اجرائیه رییس ډاکتر عبدالله عبدالله وايي، د ټاکنیزو کمېسیونونو نوي غړي باید د ټاکنو په تړاو د ولس باور بېرته تر لاسه کړي.
د جمهور آژانس د خبر له مخې ښاغلي عبدالله نن دوشنبې د کب ۲۰ مه د وزیرانو شورا غونډه کې و ویل، د یادو کمېسیونونو له نویو غړو تمه لري، چې د ولسمشرۍ، ولایتي او ولسوالیو شوراګانو ټاکنې په رڼه او بې پرې توګه تر سره کړي.
نوموړي زیاته کړه، چې همدا د ټول ولس غوښتنه هم ده او د ټاکنیزو کمېسیونونو غړي باید د ولس دغه غوښتنې درناوی ولري او د ټاکنو په تړاو یې باور تر لاسه کړي.
د ښاغلي عبدالله په وینا ټاکنې، چې د هېواد او ولس برخلیک ورسره تړلی، د کمېسیونونو د نویو غړو لپاره یو ملي مسوولیت دی او باید په سمه توګه یې تر سره کړي.
باید و ویل شي، چې د ټاکنو د کمېسیونونو نوي غړي څو ورځې وړاندې د ولسمشرۍ د نوماندانو له خوا په یوه انتخاباتي پروسه کې غوره او له هغې وروسته د ولسمشر له خوا وټاکل شول.
دوی تېره هفته په ارګ کې د ولسمشر غني، ډاکتر عبدالله او نورو چارواکو پر وړاندې د لوړې مراسم تر سره او په خپل کار یې رسمآ پیل وکړ.
جمهورخبري آژانس:کابل
