د هند د بهرنیو چارو وزارت وايي، هندي هوايي ځواک د پاکستان خاوره کې د جیش محمد وسله والې ډلې تر ټولو لوی مرکز له منځه وړی دی.
د جمهور آژانس د خبر له مخې هندي چارواکي وايي، وار وار یې پکستان ته باوري استخباراتي معلومات ور کړل چې ترهګر دا ځمکه کاروي.
خو په وینا یې اسلام اباد د دې پر وړاندې کوم غبرګون نه ښوده، ځکه نوي ډېلي پرېکړه وکړه چې د ممکنه بریدونو د مخنیوي لپاره د جیش محمد پرضد بریدونه اړین دي.
د هند د بهرنیو چارو مرستیال وزیر ویجې ګوکلې نن سه شنبې په یوه خبري غونډه کې و ویل، چې د استخباراتي معلوماتو له مخې یې د پاکستان په بالاکوټ سیمه کې د جیش محمد تر ټولو ستر مرکز په نښه کړی دی.
ښاغلی ګوکلې وايي، هند ته د پېښ ممکنه خطر له امله یې دا برید کړی او برید د ځنګل پوښلي غره په یوه څوکه کې پر یو مرکز شوی چې له ولسي خلکو لېرې و.
د هند بهرنیو چارو مرستیال وزیر ویلي، بالاکوټ کې دا مرکز د جیش محمد ډلې د مشر مسعود اظهر اوښي او په استاد غوري مشهور مولانا یوسف اظهر چلاوه.
د اې اېن ای په نوم د هند هوایي ځواک اژانس وايي، هندۍ معراج الوتکې پاکستان سره له کنټرول کرښې اوښتې دي او د ترهګرو لوی مرکز یې له منځه وړی دی.
په ورته وخت کې د پاکستان د بهرنیو چارو وزیر شاه محمد قریشي نن د دفاع او مالیې وزیرانو سره یو ځای په یوه خبري غونډه کې د هند دغه برید وغانده او ویې ویل پاکستان هېڅ کله هم نه غواړي، چې وضعیت ترینګلی کړي.
قریشي په اسلام آباد کې خبري غونډې ته و ویل، وضعیت نازک دی او دی نه غواړي چې داسې څه ووایي چې ورسره وضعیت نور هم خراب شي.
د پاکستان حکومت له برتانیا نه هم غوښتنه کړې چې له خپل نفوذ نه په ګټې د پاکستان او هند ترمنځ د ترینګلتیا په کمولو کې رول ولوبوي.
قریشي وايي په دې اړه یې له عربي او یو شمېر نورو هېوادونو سره هم اړیکې نیولې، چې دغه ستونزه د خبرو له لارې حل کړي.
د هغه په وینا د هند له برید وروسته پاکستان هم د برید حق لري او دا برید به په مناسب وخت او ځای ورکړي.
جمهورخبري آژانس:کابل
