ارګ تایید کړه، چې د غزني ولایت په جاغوري ولسوالۍ کې د وسله والو طالبانو د جګړې اصلي قوماندان وژل شوي دی.
د
جمهور خبري آژانس د خبر له مخې د ولسمشرۍ ماڼۍ مرستیال ویاند شاه حسین مرتضوي نن چهارشنبې د لړم ۲۳ مه ویلي«د جاغوري د جګړې د طالبانو اصلي او په والي مشهور قوماندان د ګلابي اخندزاده وراره وژل شوی دی»
مرتضوي په دې اړه نور معلومات نه دي ورکړی، خو راپورونه وایي، دفاع وزارت په جاغوري او مالستان ولسوالیو کې د پراخو پوځي عملیاتو تابیا کړې ده.
په دغه ولسوالیو کې له تېرو څو ورځو راهیسې د وسله والو طالبانو حملې زیاتې شوې، چې په جګړه کې افغان ځواکونو ولسي وګړو او خپله طالبانو ته هم درنه مرګ ژوبله اوښتې.
په مالستان او جاغوري کې د روانو جګړو له امله سلګونه کورنۍ بامیانو ولایت ته کډه شوې، چې ویل کېږي له سختو ستونزو سره مخ دي.
د غزني د جاغوري او مالستان او دغه راز د خاص اروزګان ولسوالۍ د جګړو او ولسي وګړو ته د مرګ ژوبلې اوښتو په غبرګون په کابل کې لاریونونه هم وشول.
خو ولسمشر غني او امنیتي چارواکو لاریونوالو ته ډاډ ورکړ، چې حکومت به د دغه سیمو د امنیت د کابو کولو په پار بېړني اقدامات تر سره او پراخ عملیات به پیل کړي.
جمهورخبري آژانس:کابل