۰
وال سټرېټ ژورنال:

زلمي خلیلزاد د افغانستان د ولسمشرۍ ټاکنو د ځنډولو غوښتنه کړې ده

سی شنبه ۲۲ عقرب ۱۳۹۷ ساعت ۰۸:۰۱
وال سټرېټ ژورنال ورځپاڼې راپور ورکړی، چې د افغان سولې پاره د امریکا ځانګړي استازي زلمي خلیلزاد د افغانستان د ولسمشرۍ ټاکنو د ځنډولو غوښتنه کړې.
زلمي خلیلزاد د افغانستان د ولسمشرۍ ټاکنو د ځنډولو غوښتنه کړې ده
وال سټرېټ ژورنال ورځپاڼې راپور ورکړی، چې د افغان سولې پاره د امریکا ځانګړي استازي زلمي خلیلزاد د افغانستان د ولسمشرۍ ټاکنو د ځنډولو غوښتنه کړې.

د جمهور خبري آژانس د خبر له مخې په راپور کې ویل شوي، خلیلزاد د افغان چارواکو سره لیدنه کې له هغوی غوښتي، چې د ولسمشرۍ ټاکنې وځنډوي.

په ورته وخت کې امریکا غږ لیکلي، د ولسمشر ټرمپ اداره پر دې بحث لري، چې د افغانستان د ولسمشرۍ ټاکنو د ځنډولو له پاره پر افغان حکومت فشار راوړي که نه.

وال سټرېټ ژورنال هم د امریکايي چارواکو له قوله ویلي دا موضوع د واشنګټن یو له انتخابونو دی او د ډېرمپ اداره بیړنه د افغانستان اوږدې جګړې ته د حل یوه سیاسي لار موندل دي.

امریکايي چارواکو ویلي زلمي خلیلزاد د اپريل د میاشتې ټاکنو د ځنډ په اړه افغانستان کې له بېلابېلو چارواکو سره دا خبره مطرح کړې، خو دا په افغانستان کې د دیموکراسۍ له پاره د امریکا د هڅو خلاف عمل دی.

دغه ورځپاڼې ویلي د خلیلزاد دفتر په دې اړه له څه ویلو ډډه کړې، خو ورځپاڼه لیکي، چې د ولسمشرۍ ټاکنو د ځنډولو لامل ښايي له طالبانو سره د سولې ګونګې خبرې وي.

د ورځپاڼې په باور امریکایي چارواکو له دې وېره لري، چې په افغانستان کې اوږدې سیاسي کشالې او بې نظمۍ چې د ټاکنو له بهیر سره مل وي ښايي د خلیلزاد د سولې هڅې له منځه یوسي.

وال سټرېټ ژورنال وایي، له افغان چارواکو او سیاسو سره خبرو کې د زلمي خلیلزاد دغه غوښتنه له ساړه غبرګون سره مخ شوې او ډېر هغو له دې خبرې سره مخالفت څرګندی کړی دی.

خو د ولسمشرۍ غني دولت کې ځینو هغو له دې خبرې ملاتړ څرګند کړی او ویلي یې دي، چې که د ټاکنو پر ځنډ سوله راځي نو دوی وروسره کوم مخالفت نه لري، بلکې ملاتړ یې کوي.

په ورته وخت کې یوه لوېدیځوال دیپلومات ویلي، بله کړنلاره چې تر بحث لاندې ده، دا ده چې ولسمشرۍ ټاکنو ته باید په هغه صورت کې اجازه ورکړل شي، چې یوی انتقالي حکومت رامنځ ته او کار وکړي تر څو یو داسې ائتلافي حکومت رامنځ شي، چې طالبان هم په کې شامل وي.

ورځپاڼه وایي، درېیمه کړنلاره بیا د لویې جرګې جوړول دي، چې د پخواني ولسمشر کزري په ګډون یې ګڼ ځواک مند افغان سیاسیو غواړي، تر چې دغه لویه جرګه یو انتقالي حکومت رامنځ او افغانستان کې د جګړې د پای ته رسولو له پاره طرحې جوړې او جګړه پای ته ورسول شي.

د پلان له مخې ټاکل شوې د افغان سولې له پاره د امریکا ځانګړی استازی زلمی خلیلزاد قطر کې د طالب استازو سره وګوري او یا هم دوبۍ کې ورسره خبرې وکړي.

د امریکا حکومت یوه پخواني چارواکي هم وال سټرېټ ژورنال ته ویلي، خلیلزاد ښایي د ولسمشرۍ ټاکنو د ځڼډ موضوع د سولې د اساسي خبرو د پیل له پاره د طالبانو د هڅولو په موخه په پام کې نیولي وي او ښایي دغه څه د سولې د خبرو یوه برخه وي.

دغه ورځپاڼې د مقالې په پای کې وايي، په داسې حال کې، چې زلمی خلیلزاد د ولسمشرۍ ټاکنو د ځڼډ پر کړنلاره کار کوي، خو په افغانستان کې نور دخیل امریکايي چارواکي له ولسمشر غني د اپرېل میاشت کې د ټاکنو له پاره په چمتوالي بوخت دي.

جمهورخبري آژانس:کابل



 
ستاسو نوم

ستاسو دبرېښنا ليک پته
ستاسو نظر *

تر ټولو ډېر لیدل شوي